Majeed Amjad
meri manind ḳhud-nigar tanha
ye surahi men phuul nargis ka
itni sham.en thiin teri yadon ki
apna saaya bhi apna saaya na tha
mere nazdik teri duuri thi
koi manzil thi koi aalam tha
haa.e vo zindagi-fareb ankhen
tu ne kya socha main ne kya samjha
subah ki dhuup hai ki raston par
munjamid bijliyon ka ik dariya
ghungruon ki jhanak-manak men basi
teri ahaT! main kis ḳhayal men tha
phir kahin dal ke burj par koi aks
faslon ki fasil se ubhra
phuul murjha na jaa.en bajron men
manjhiyo koi giit sahil ka
vaqt ki sarhaden simaT jatin
teri duuri se kuchh ba.iid na tha
umr jalti hai baḳht jalvon ke
ziist miTti hai bhaag miTTi ka
rahen dardon ki chaukiyan chaukas
phuul lohe ki baaḌ par bhi khila
jo ḳhud un ke dilon men tha tah-e-sang
vo ḳhazana kisi kisi ko mila
laakh qadren thiin zindagani ki
ye muhit ik ajiib zaviya tha
hai jo ye sar pe gyaan ki gaThri
khol kar bhi ise kabhi dekha
roz jhukta hai ku-e-dil ki taraf
kaḳh-e-sad-bam ka koi ziina
Leave a Reply