Tishnagi Achchhi Nahin Rakhna Bahut

tishnagi achchhi nahin rakhna bahut

rauzan-e-gul se use takna bahut

dekh kar jis shakhs ko hansna bahut

sar ko is ke samne Dhakna bahut

jis ki ankhon men na jhanka jaega

is ki hi tahrir ko padhna bahut

mauja-e-reg-e-ravan hai zer-e-ab

apni hasti dekh kar badhna bahut

barf ki manind jiina umr bhar

ret ki surat magar tapna bahut

umr bhar ki bandishen khvab-o-khayal

do qadam bhi saath hai chalna bahut

khastagi ‘nahid’ ban jaae na jurm

apni hasti dekh kar badhna bahut

Leave a Comment