Hashim Raza Jalalpuri
na koi abla-pa.i na ghaav chahti hai
hamari ḳhana-badoshi paḌav chahti hai
sukut-e-dahr ragon men utar na jaa.e kahin
ye Thahri Thahri tabi.at bahav chahti hai
main ik faqir use de chuka huun kab ka talaq
magar ye duniya ki mujh se lagao chahti hai
hava-e-bahr havas men ThiThurne vaali ruuh
labon ki aag badan ka alaav chahti hai
koi bhi shaḳhs pahunchta nahin kinare par
ye naḳhuda ki hai sazish ya naav chahti hai
na.i naveli dulhan ki hatheliyon ki tarah
miri ghazal bhi hamesha rachao chahti hai
Leave a Reply