Ishaq Virdag
main zamin Thahra to us ko asman hona hi tha
asman ho kar use na-mehrban hona hi tha
pyaas ki tahrir se to ye ayaan hona hi tha
be-nishan batil to haq ko javedan hona hi tha
ruuh ki tajsim se mumkin hui hai zindagi
la-makan ke vaste bhi ik makan hona hi tha
vo gunah ki sarzamin par jannaton ka ḳhvab tha
is tarah ke ḳhvab ko to ra.egan hona hi tha
kab thi firdaus-e-barin men lazzat-e-lutf-e-gunah
is zamin ki justuju men kuchh ziyan hona hi tha
be nishan raston pe ab tak gamzan hai ye zamin
is liye bhi asman ko be-karan hona hi tha
men chala tha raat ko bhi din banane ke liye
sar pe mere dhuup ko phir sa.eban hona hi tha
Leave a Reply