Sajjad Babar
hava men kuchh to ghula tha ki honT niile hue
gale lagate hi taaza gulab piile hue
na dasht-e-jan pe barsi rafaqaton ki phuvar
na aankh men chamak aa.i na lab hi giile hue
andhere oḌhna chahe to badliyan chamkin
charagh ujalna chahe to laakh hiile hue
tamam raat usi kohar ke jazire par
ulajh ulajh ke shuaon ke haath niile hue
mohabbaton ko baḌhao ki ranjishen bhi miTen
sukun na hoga agar muḳhtalif qabile hue
kuchh itni tez hai ye lafz ki sharab use
kashid karte hue haath bhi nashile hue
tahon men baiThna chaha agar kabhi ‘sajjad’
gale ka haar ka.i be-talab vasile hue
Leave a Reply