Qaisarul Jafri
na saval-e-jam na zikr-e-mai usi bankpan se chale ga.e
tira zarf dekh ke tishna-lab tiri anjuman se chale ga.e
kabhi tu ne socha bhi sub.h-e-nau ki tamam raat guzar ke
jinhen Das ga.i tiri raushni vo kahan vatan se chale ga.e
mujhe dhun ki kakul-e-zindagi jo bikhar ga.i hai sanvar duun
tumhen gham ki ishq ke tazkire mire sher-o-fan se chale ga.e
tire gesuon se aziiz thiin jinhen ka.enat ki uljhanen
tira gham sameT ke ruuh men tiri anjuman se chale ga.e
mire dil ko ‘qaisar’-e-be-nava koi gham shikast na de saka
ki ulajh ke saikḌon hadse mire bankpan se chale ga.e
Leave a Reply