na puchh rah-e-talab men kidhar se guzra huun
tire hi paas se guzra jidhar se guzra huun
ḳhuda gavah ki dil men ḳhulus-e-gham le kar
ba-ehtiram shab-e-be-sahar se guzra huun
tiri nazar ko bhi ab tak ḳhabar nahin ai dost
is ehtiyat se teri nazar se guzra huun
tire ḳhayal ko bhi Thes lag na jaa.e kahin
bahut sanbhal ke gham-e-mo’tabar se guzra huun
kabhi kabhi to ik aisa maqam aaya hai
main husn ban ke ḳhud apni nazar se guzra huun
bas is qadar hai miri sharh-e-sarguzasht-e-hayat
kisi ki ik nigah-e-muḳhtasar se guzra huun
kise bata.un kya ai ‘arzu’ main kitni baar
ḳhud un ke zehn men un ki nazar se guzra huun
Leave a Reply