to phir main kya agar anfas ke sab taar gum us men
mire hone na hone ke sabhi asar gum us men
miri ankhon men ik mausam hamesha sabz rahta hai
ḳhuda jaane hain aise kaun se ashjar gum us men
hazaron saal chal kar bhi abhi ḳhud tak nahin pahunchi
ye duniya kaash ho jaa.e kabhi ik baar gum us men
vo jaisa abr bheje jo hava sar par chala.e vo
mire dariya mire sahra mire kohsar gum us men
nahin malum aḳhir kis ne kis ko thaam rakkha hai
vo mujh men gum hai aur mere dar o divar gum us men
‘zafar’ us ke the ham to kab talak us se alag rahte
hue ham ek din hona tha aḳhir-kar gum us men
Leave a Reply