hai afat-e-jan husn ki shoḳhi bhi ada bhi
honTon pe tabassum bhi hai nazron men haya bhi
shamil tiri avaz men taron ki nava bhi
sharminda tire nuur se kirnon ki ziya bhi
mahfil hai ki mutrib ke isharon pe miTi hai
sunta hai koi saz-e-shikasta ki sada bhi
rakhta hai baghavat ke sharare bhi nazar men
ye ishq jo hai paikar-e-taslim-o-raza bhi
ruḳh pher diya tund havaon ka kisi ne
halat se apne koi majbur raha bhi
bach kar hi chale ham to zamane ki ravish se
azad-ravi ka hamen ehsas hua bhi
akasr lab-e-la.alin ke tabassum ki kiran ne
ummid ke ḳhakon men naya rang bhara bhi
ai ‘naqsh’ karen soz-e-tamanna ka bayan kya
sau baar diya dil ka jala bhi hai bujha bhi
Leave a Reply