Asrarul Haq Asrar
kaun hai kis ka ḳharidar chalo chhoḌo bhi
hain sabhi raunaq-e-bazar chalo chhoḌo bhi
koi zahid hai na mai-ḳhvar chalo chhoḌo bhi
hain sabhi sahab-e-kirdar chalo chhoḌo bhi
farq kya mulzim-o-munsif men bataya jaa.e
hai ye be-kar ki takrar chalo chhoḌo bhi
kuchh rusumat-e-kuhan hain ki nibahen kab tak
unsiyat muḳhlisi kirdar chalo chhoḌo bhi
laakh ab aap kiye jaa.en masiha.i to kya
hai vahi dard ki jhankar chalo chhoḌo bhi
dil ki rahon pe bhala tum bhi chaloge kab tak
ḳhaar hi ḳhaar hain ‘asrar’ chalo chhoḌo bhi
Leave a Reply