barā.e-nām koī rābta huā to sahī
ki ek shaḳhs mire haal par hañsā to sahī
zarā sī der ko sadiyoñ kī ḳhāmushī to ga.ī
navāh-e-jāñ se koī shor sā uThā to sahī
dil-e-shikasta ko mauhūm sī ummīd to thī
mujhe nasīb nahīñ thā magar vo thā to sahī
kabhī tamām to kar bad-gumāniyoñ kā safar
kisī bahāne kisī roz aazmā to sahī
ye kyā ki harf-o-sadā kā tabādala bhī nahīñ
kahāñ hai kaisā hai ai dost kuchh batā to sahī
har ek dil ko mohabbat pasand honā hai
‘aqīl’ ab na sahī maiñ nahīñ rahā to sahī