tanha.i ki ḳhalij hai yuun darmiyan men
har shaḳhs jaise qaid ho andhe makan men
us ke labon pe sat-samundar ka aks tha
sadiyon ki pyaas jazb thi meri zaban men
aa.i agar ghaTa use suraj ne kha liya
ab ke baras bhi aag lagi asman men
Takra ke iḳhtilaf ki divar toḌ di
ziddi tha sar-buland hua ḳhandan men
yuun bhi dahakte dasht se kya kam thi zindagi
be-kar dhuup kuud paḌi darmiyan men
behtar hai apne-ap se kuchh bolte raho
yuun chup rahe to zang lagega zaban men
Leave a Reply