Anwar Shuoor
nahin ḳhasta-hali pe na-mutma.in ham
yahi TaaT maḳhmal yahi TaaT resham
ham achchhi tarah jante hain ye naseh
ki sachcha.i ka ajr hai saghar-e-sam
kisi haal men bhi rakhe rakhne vaala
bhala dahr men kya ḳhushi aur kya gham
nahin apni gha.eb-dimaghi pe hairat
mohabbat men hota hai aksar ye aalam
koi shor sa dil men rahta hai barpa
dama-dam dama-dam dama-dam dama-dam
rahe tazkire amn ke ashti ke
magar bastiyon par baraste rahe bam
kahan chain se aaj duniya men koi
ye jannat bana di ga.i hai jahannam
na guzra kabhi ek lamha sukun se
mohabbat men aa.e vo din-rat paiham
Leave a Reply