husul-e-maqsad men aḳhirash yuun rahegi qismat daḳhil kab tak
tum apni nakamiyon pe doge muqaddaron ki dalil kab tak
samundaron ki riyasaton ko luTa ke avara phirne vaalo
ab ek qatre ki minnaton se karoge ḳhud ko zalil kab tak
tu mard-e-momin hai apni manzil ko asmanon pe dekh nadan
ki rah-e-zulmat men saath dega koi charagh-e-alil kab tak
jalal-e-rafta ko bhuul bhi ja zarurat-e-hal par nazar kar
rakhe ga chulhe ki aag ThanDi pa.e-vaqar-e-qabil kab tak
darazi-e-qad se aadmi ko nasib hoti nahin bulandi
tujhe fareb-e-faraz degi ye kajkulah-e-tavil kab tak
Leave a Reply