main apni aankh ko us ka jahan de duun kya
zamin khinch luun aur asman de duun kya
main duniya zaad nahin huun mujhe nahin manzur
makan le ke tumhen la-makan de duun kya
ki ek roz khula rah gaya tha a.ina
agar gavah banun to bayan de duun kya
uḌe kuchh aise ki mera nishan tak na rahe
main apni ḳhaak ko itni uḌaan de duun kya
ye lag raha hai ki na-ḳhush ho dosti men tum
tumhare haath men tiir o kaman de duun kya
samajh nahin rahe be-rang ansuon ka kaha
unhen main surḳh-lahu ki zaban de duun kya
suna hai zindagi koi tah-e-samundar hai
bhanvar ke haath men ye badban de duun kya
ye faisla mujhe karna hai ThanDe dil se ‘raza’
nahin badalta zamana to jaan de duun kya
Leave a Reply