jinhen mahfilon se gharaz na thi vo jo qaid apne gharon men the
vahi e.atibar-e-zamana the vahi log dida-varon men the
hue haath ab to lahu lahu sar-e-chashm andhera hai char-su
kabhi ham bhi a.ina-saz the kabhi ham bhi shisha-garon men the
chali shahr men vo hava-e-zar ki ghubar ban ke ga.e bikhar
vo jo ḳhvab ankhon men the makin vo junun jo apne saron men the
mire muhsinon men hain shahr ke ye tavil-o-ashna raste
kahin aur jaa.e amaan na thi ki ghanim-e-jan to gharon men the
vahi jin ki tegh se ban gaya mira shahr maqtal-e-ḳhun-fishan
sar-e-am dida-e-nam liye vahi log nauhagaron men the
ik udaas basti men vaqt-e-shab main gaya to aise makan the sab
na to khiḌkiyon men the mah-ru na charagh un ke daron men the
sar-e-sham duur fazaon men ye jo aa.ine se chamak uThe
yahi Dhalti dhuup ke rang the ki jo ta.eron ke paron men the
Leave a Reply