Shahid Zaki
zabt-e-gham hai miri poshak miri izzat rakh
atish-e-dida-e-namnak miri izzat rakh
khul na jaa.e ye miri aks-farebi kisi din
a.ina-ḳhana-e-idrak miri izzat rakh
meri miTTi se charagh-e-dar-o-divar bana
dar-ba-dar kar ke miri ḳhaak miri izzat rakh
partav-e-dagh-e-guzishta ruḳh-e-farda pe na Daal
gardish-e-sa.at-e-saffak miri izzat rakh
baḌi mushkil se bana.i hai ye izzat main ne
jazba-e-kar-e-havasnak miri izzat rakh
ya samundar se miri ḳhaak juda kar ‘shahid’
ya bana de mujhe tairak miri izzat rakh
Leave a Reply