Farhat Ehsas
mohabbat chahte ho kyuun vafa kyuun mangte ho
tum un bimar ankhon se dava kyuun mangte ho
musafir ho to niklo paanv men ankhen laga kar
kisi bhi ham-safar se rasta kyuun mangte ho
unhen to ḳhud hi apni jaan ke laale paḌe hain
bechare shahr valon se hava kyuun mangte ho
abhi kuchh tha abhi kuchh hai badan ab-e-ravan sa
badan se aj-kal ka vaqi.a kyuun mangte ho
hudud-e-ḳhak se bahar nahin aa pa.ega husn
vo jitna hai use us se siva kyuun mangte ho
hujum-e-shahr men se tiir se nikle chale jaao
hujum-e-shahr se us ki raza kyuun mangte ho
mohabbat aap hi apna sila hai ‘farhat-ehsas’
mohabbat kar rahe ho to sila kyuun mangte ho
Leave a Reply