dastak si ye kya thi koi saaya hai ki main huun
ik shaḳhs miri tarah ka aaya hai ki main huun
sab jaisa huun lekin mire tasvir-garon ne
chehra mira is ruḳh se banaya hai ki main huun
kya niind thi vo apne na hone ke nashe ki
kyuun ye mire hone ne bataya hai ki main huun
main huun ki hain maujud mire dekhne vaale
ḳhud mujh ko to kam kam nazar aaya hai ki main huun
main huun so ye ḳhushbu tiri aati rahi mujh se
kuchh tere bhi hone se sujhaya hai ki main huun
main is men magan vahm hai ya ḳhvab hai hasti
logon ne magar daam bichhaya hai ki main huun
dekhun to mire aks se kya kahta hai dariya
pal-bhar ko to lahron ne bataya hai ki main huun
kuchh rang laga.e bhi hain tasvir-garon ne
ya hans ke ye kaghaz hi uḌaya hai ki main huun
kuchh kam to nahin ye mire hone ki gumrahi
is jurm men kis kis ne sataya hai ki main huun
Leave a Reply