mohabbat ba.is-e-divangi hai aur bas main huun
ki ab paiham inayat aap ki hai aur bas main huun
sukun hasil hai din men aur na shab ko chain milta hai
ki ab to kashmakash men zindagi hai aur bas main huun
na jaane majra kya hai nazar kuchh bhi nahin aata
ki ab hadd-e-nazar tak tirgi hai aur bas main huun
nahin hai aaj mujh ko ḳhadsha-e-zulmat zamane men
ruḳh-e-taban ki un ke raushni hai aur bas main huun
qadam kya Dagmaga.enge rah-e-ulfat men ai saaqi
bahut hi muḳhtasar si be-ḳhudi hai aur bas main huun
tire naqsh-e-qadam par sar jhukana kaam hai apna
ḳhuda shahid ye meri bandagi hai aur bas main huun
unhen rudad-e-gham apni suna.un kis tarah ‘qaisar’
vahi un ki ada-e-barhami hai aur bas main huun
Leave a Reply