Sabiha Saba
ye sail-e-ashk mujhe guftugu ki taab to de
jo ye kahun ki vafa ka miri hisab to de
bhari bahar-ruton men bhi khaar le aai
ye intizar ki tahni kabhi gulab to de
nahin nahin main vafa se kinara-kash to nahin
vo de raha hai mujhe hijr ka azaab to de
ye khamushi to qayamat ki jaan leva hai
vo dil dukhae magar baat ka javab to de
har ek vaqia tarikh-dar likh jaun
gae dinon ki mire haath vo kitab to de
ye dekh kis gul-e-tar par nigah thahri hai
na de vo phuul mujhe dad-e-intikhab to de
gunahgar sahi phir bhi mere hisse ka
tiri taraf jo nikalta hai vo savab to de
Leave a Reply