ye zamin ḳhvab hai asman ḳhvab hai
ik makan hi nahin la-makan ḳhvab hai
jan-leva sahi justuju ki thakan
par sahara diye ik javan ḳhvab hai
us ki ankhon men apna.iyat ki chamak
meri ankhon ka ik be-aman ḳhvab hai
TuuT jaa.e to kuchh bhi nahin koi bhi
jis ke dam se hain donon jahan ḳhvab hai
chilchilati hui vaqt ki dhuup men
saath ik saya-e-mehrban ḳhvab hai
tu sarab-e-hasin main fareb-e-nazar
pyaar tera miri jan-e-jan ḳhvab hai
shadi-e-be-panah ka sabab hai magar
vaj.h-e-ah-o-fughan bhi miyan ḳhvab hai
zindagi ke kaThin jangalon men mira
har qadam rahbar pasban ḳhvab hai
jan-e-‘shahzad’ tanha.iyan hain aTal
aur baaqi ka ye karvan ḳhvab hai
Leave a Reply