har ik shajar pe parinde simaT ke baiThe hain
hava-e-sard ke jhonke bahut nukile hain
kahan sambhalta hai jaldi kisi ki maut se dil
haan Thik-Thak hain pahle se thoḌe achchhe hain
dhuan dhuan si hai fihrist-e-raftagan lekin
do ek chehre hain vaise hi jagmagate hain
tujhe ḳhabar bhi hai ai dost tere marham se
kuchh ek zaḳhm jo andar na.e se bante hain
qadam qadam pe na.e moḌ muḌne vaale log
na jaane kyon mujhe ab Thiik jaan paḌte hain
juda hue to bahut din guzar ga.e lekin
hava-e-taza ke jhonkon se ab bhi Darte hain
kabhi to ḳhuub sisakte hain be-tarah aur phir
ḳhayal-e-marg se yak-dam chahakne lagte hain
Leave a Reply