itni muddat dil-e-avara kahan tha ki tujhe
apne hi ghar ke dar-o-bam bhula baithe hain
yaad yaron ne to kab harf-e-mohabbat rakkha
ghair bhi taana o dushnam bhula baithe hain
to samajhta tha ki ye dar-badari ka aalam
duur deson ki inayat tha so ab khatm hua
tu ne jaana tha ki ashufta-sari ka mausam
dasht-e-ghurbat ki vadiat tha so ab khatm hua
ab jo tu shahr-e-nigaran men qadam rakkhega
har taraf khilte chale jaenge chehron ke gulab
dost-ahbab tire naam ke takraenge jaam
ghair-aghyar chukaenge raqabat ke hisab
jab bhi gaegi koi ghairat-e-nahid ghazal
sab ko aaega nazar shoala-e-avaz men tu
jab bhi saaqi ne surahi ko diya izn-e-khiram
bazm ki bazm pukaregi ki aghaz men tu
maaen rakkhengi tire naam pe aulad ka naam
baap beton ke liye teri bayazen lenge
jin pe qadghan hai vo ashar padhegi khilqat
aur tuute hue dil tujh ko salami denge
log ulfat ke khilaune liye bachchon ki tarah
kal ke ruthe hue yaron ko mana laenge
lafz ko bechne vaale nae bazaron men
ghairat harf ko laate hue sharmaenge
lekin aisa nahin aisa nahin ai dil ai dil
ye tira des ye tere dar-o-divar nahin
itne yusuf to na the misr ke bazar men bhi
jins is darja hai vafir ki kharidar nahin
sar kisi ka bhi dikhai nahin deta hai yahan
jism hi jism hain dastaren hi dastaren hain
tu kisi qarya-e-zindan men hai shayad ki jahan
tauq hi tauq hain divaren hi divaren hain
ab na tiflan ko khabar hai kisi divane ki
aur na avaz ki ”o chaak gareban vale”
na kisi haath men patthar na kisi haath men phuul
kar gae kuuch kahan kucha-e-janan vaale
Leave a Reply