harif-e-gardish-e-ayyam to bane hue hain
vo aenge nahin aenge ham saje hue hain
baḌa hi ḳhushiyon bhara hansta-basta ghar hai mira
isi liye to sabhi qumqume jale hue hain
vo ḳhud-pasand hai ḳhud ko hi dekhna chahe
so us ke charon taraf aaine lage hue hain
ye kis hasin ki savari guzarne vaali hai
jo kaenat ke sab raste saje hue hain
mahak rahi hai faza us badan ki ḳhushbu se
chaman hara-bhara hai phuul bhi khile hue hain
main us ki samt men ḳhud rasta bana.unga
vagarna us ki taraf raste bane hue hain
Leave a Reply