Rakhshan Hashmi
x
hai vahi manzar-e-ḳhun-rang jahan tak dekhun
main faqat ek hi tasvir kahan tak dekhun
niind TuuTi hai mire ḳhvab kahan TuuTe hain
aks tera hi haqiqat se guman tak dekhun
itni vus.at se miri qalb-o-nazar ko maula
aankh sahra pe dharun ab-e-ravan tak dekhun
rut koi aa.e kabhi phuul khilane vaali
kab talak aag har ik sahn-o-makan tak dekhun
aa.ina hote hue apna uruuj aur zaval
matla.a-e-sub.h se maghrib ki azaan tak dekhun
baad allah ke vo hai miri shah-rag ke qarib
kab mire dil ki sada jaati hai maan tak dekhun
dil ki dahliz hi se lauT gaya vo ‘raḳhshan’
chahti thi main jise jism se jaan tak dekhun
Leave a Reply