Hai Wahi Manzar-E-KHun-Rang Jahan Tak Dekhun

x

hai vahī manzar-e-ḳhūñ-rañg jahāñ tak dekhūñ

maiñ faqat ek hī tasvīr kahāñ tak dekhūñ

niiñd TuuTī hai mire ḳhvāb kahāñ TuuTe haiñ

aks terā hī haqīqat se gumāñ tak dekhūñ

itnī vus.at se mirī qalb-o-nazar ko maulā

aañkh sahrā pe dharūñ āb-e-ravāñ tak dekhūñ

rut koī aa.e kabhī phuul khilāne vaalī

kab talak aag har ik sahn-o-makāñ tak dekhūñ

aa.ina hote hue apnā uruuj aur zavāl

matla.a-e-sub.h se maġhrib kī azaañ tak dekhūñ

baad allāh ke vo hai mirī shah-rag ke qarīb

kab mire dil kī sadā jaatī hai maañ tak dekhūñ

dil kī dahlīz hī se lauT gayā vo ‘raḳhshāñ’

chāhtī thī maiñ jise jism se jaañ tak dekhūñ

Leave a Comment