Zaheer Kashmiri
hamrah lutf-e-chashm-e-gurezan bhi aa.egi
vo a.enge to gardish-e-dauran bhi aa.egi
niklegi bu-e-zulf hamari talash men
sahra men ab hava-e-gulistan bhi aa.egi
vo jin ko apne tark-e-ta.alluq pe naaz tha
aaj un ko yaad sohbat-e-yaran bhi aa.egi
ham ḳhud hi be libas rahe is ḳhayal se
vahshat baḌhi to su-e-gareban bhi aa.egi
tai ho chuka hai sud-o-ziyan ka mo.amla
zaḳhm a.enge to lazzat-e-paikan bhi aa.egi
DhunDhegi sar-barahna hamen dasht-e-hijr men
ik din junun men ghairat-e-janan bhi aa.egi
ai rah-navard-e-ishq sambhal kar qadam baḌha
is raste men zulmat-e-hijran bhi aa.egi
vo barq jo hudud-e-nazar se pare rahi
vo barq ab qarib-e-rag-e-jan bhi aa.egi
kaT ja.ega ye karb-e-shab-e-gham bhi ai ‘zahir’
shub.h-e-nashat-o-fasl-e-nigaran bhi aa.egi
Leave a Reply