Ghani Aabaadiyon Ki Be-Amani Ka Tamasha Kar

Arman Najmi

ghani abadiyon ki be-amani ka tamasha kar

nikal kar ghar se marg-e-na-gahani ka tamasha kar

jo zinda aag men Daale ga.e lashen na gin un ki

jo bach nikle hain un ki saḳht-jani ka tamasha kar

jo taḳht-o-taj ke malik hain kya vo mo’tabar bhi hain

shar-angezi men Duubi hukmarani ka tamasha kar

bacha kya rah gaya kalak bhare jhulse makanon men

ujaḌi bastiyon ki be-nishani ka tamasha kar

na.i tariḳh ke safhon pe likkha ja raha hai kya

huruf-e-qahr ki atish-fishani ka tamasha kar

jo dil men hai use na-gufta rahne de to behtar hai

badalti surat-e-harf-o-ma.ani ka tamasha kar

na koi ḳhvab baaqi hai na aansu ḳhushk ankhon men

tahi-daston ki gum-sum nauha-ḳhvani ka tamasha kar

har ik shab shukr kar teri abhi gardan salamat hai

har ik din sail-e-ḳhun ki be-karani ka tamasha kar

qayamat sar tak aa pahunchi hai rakh le haath ankhon par

mata-e-zindagi ki ra.egani ka tamasha kar