kis ko malum ki vo log kahan rahte hain
teri dhun men jo shab-o-roz ravan rahte hain
jo fasane sabaq-amoz jahan rahte hain
ta-dam-e-marg vahi vird-e-zaban rahte hain
talḳhi-e-gham hi sahi talḳhi-e-ayyam sahi
gamzan ham ba-rah-e-zinda-dilan rahte hain
be-zabani pe na ja apni ki majzub sahi
ḳhud-faramosh haqiqat-nigaran rahte hain
teri mahfil men charaghon ki zarurat kya hai
gham ke sho.ale to sar-e-sham javan rahte hain
mausam-e-gul men bhi ham ahl-e-junun zindan men
be-niyaz-e-ḳhabar-e-sud-o-ziyan rahte hain
Leave a Reply