ro raha tha main bhari barsat thi
haal kya khulta andheri raat thi
mere nalon se hai barham baghban
ye ḳhafa hone ki koi baat thi
din nahin dekha siva-e-sham-e-hijr
zindagi-bhar men yahi ik raat thi
nala-o-ah-o-fughan se baḌh ga.i
varna ulfat ik zara si baat thi
hashr tak laaya jahan se dard-e-dil
kis ko deta kya koi saughat thi
band kiin ankhen ki dekhun ḳhvab-e-sub.h
khol kar jab aankh dekha raat thi
ai saba ghunchon ne hans kar kya kaha
un ka qissa tha ki meri baat thi
allah allah vahdat-e-sham-e-firaq
ek meri ek us ki zaat thi
aap hi gin den masa.ib hijr ke
yuun to kahne ke liye ik raat thi
hichkiyon se raz-e-ulfat khul gaya
aa ga.i munh par jo dil men baat thi
sham-e-marqad tujh se shikva hai mujhe
mere ghar men bhi andheri raat thi
kuchh na kuchh ‘saqib’ ne paida kar liya
ye zamin to dushman-e-abyat thi
Leave a Reply