jis men ho dozaḳh ka Dar kya lutf us jiine men hai
tauba karne men kahan vo jo maza piine men hai
ḳhushk baton men kahan ai shaiḳh kaif-e-zindagi
vo to pi kar hi milega jo maza piine men hai
main tiri tahqir kar sakta nahin ai zabt-e-shauq
mere siine men rahega raaz jo siine men hai
‘arsh’ par dekha jo tu ne ai nigah-e-dur-bin
aa dikha.un main vahi jalva mire siine men hai
Leave a Reply