karnā na thā jo kaam ziyāda kiyā gayā
jazbāt ko lagām ziyāda kiyā gayā
insān ke maqām pe rakkhā gayā hameñ
ya.anī hameñ ġhulām ziyāda kiyā gayā
pahle to koī kaam sire se huā nahīñ
phir us kā iḳhtitām ziyāda kiyā gayā
baaqī to Thīk-Thāk the hālāt shahr meñ
thoḌā sā qatl-e-ām ziyāda kiyā gayā
koshish ke bāvajūd kahīñ mil nahīñ sakī
jis shai kā ehtimām ziyāda kiyā gayā
thā jis ko aadmī se ḳhudā vāste kā bair
us ko yahāñ imaam ziyāda kiyā gayā
‘nāmī’ shumār hote haiñ phir ham ḳhavās meñ
ham ko agarche aam ziyāda kiyā gayā