Na Iltimas-O-Guzarish Na Iltija Koi

na iltimas-o-guzarish na iltija koi

na koi harf-e-dua hai na mudda.a koi

koi shikayat-o-shikva bhi hai to ḳhud se hai

fareb-e-vaqt se hargiz nahin gila koi

main is yaqin ko kaise guman shumar karun

abhi talak to mire saath saath tha koi

vo meri ruuh men ehsas-e-lams chhoḌ gaya

kuchh itne paas se ho kar guzar gaya koi

bas ek kashti talatum ki zad men aane do

ye naḳhuda bhi pukarenge hai ḳhuda koi

ye vaqi.a bhi ajab hai ki ḳhatm-e-nur ke ba.ad

dhuan pukarta hai bujh gaya diya koi

unhen bhi tark-e-marasim se ik zarar pahuncha

ki chaah kar bhi na de paa.e gham naya koi

vo ek duur ki avaz sab pe chha.i rahi

bahut qarib se deta raha sada koi

fasil-e-zabt pe rakkha hua charagh huun main

bujha na pa.egi hargiz mujhe hava koi