Arif Imam
subu men aks-e-ruḳh-e-mahtab dekhte hain
sharab piite nahin ham sharab dekhte hain
kisi bhi taur uThe par tiri nigah uThe
jala ke ghar tujhe ḳhana-ḳharab dekhte hain
use na dekh sakenge ai kaash inhen dekhen
vo kaun hain jo ise be-naqab dekhte hain
hamare chehre pe likkha gaya fasana-e-vaqt
ham a.ina nahin takte kitab dekhte hain
vo hai hi la.iq-e-sajda so ham ne sajda kiya
vo aur hain jo azaab o savab dekhte hain
havas na jaan tujhe chhu ke dekhna ye hai
tujhe hi dekh rahe hain ki ḳhvab dekhte hain
Leave a Reply