Imdad Imam Asar
apni jan-bazi ka jis dam imtihan ho ja.ega
ḳhanjar-e-saffak par jauhar ayaan ho ja.ega
ah-e-sozan ka agar uncha dhuan ho ja.ega
asman ik aur zer-e-asman ho ja.ega
kuchh samajh kar us mah-e-ḳhubi se ki thi dosti
ye na samjhe the ki dushman asman ho ja.ega
le ḳhabar bimar-e-gham ki varna ai rashk-e-masih
teri furqat men firaq-e-jism-o-jan ho ja.ega
ḳhaak kar dega mujhe aḳhir siyah-chashmon ka ishq
jism-e-ḳhaki gard-e-pa-e-ahu.van ho ja.ega
jab ada se vo karega qatl mujh ko ai ‘asar’
kushta-e-shamshir-e-hairat ik jahan ho ja.ega
Leave a Reply