Shakeel Haidar
shiddat-e-nafrat ho dil men aur amal nafrin-tar
ḳhud-baḳhud hote hain phir halat bhi sangin-tar
itni ashk-avar nigahon se mili bad-e-saba
ho ga.i hai shahr ki saari faza namkin-tar
banTte the jo kabhi ab ḳhud savali ban ga.e
dekhte hi dekhte sab ho ga.e miskin-tar
jab kabhi is sar-zamin pe main ne haq ki baat ki
apne hi ḳhuun se hua chehra mira rangin-tar
shahr-e-dil ki har gali men nala-o-fariyad hai
pahle dekha tha use ghamgin ab ghamgin-tar
jaane kaise ho ga.i kaḌvi sama.at ke liye
baat nikli thi agarche zer-e-lab shirin-tar
shauq-e-nazzara men garche dil tha mera mubtala
us ko phir teri tajalli ne kiya shauqin-tar
tamkanat apne suḳhan men thi bahut garche ‘shakil’
rafta rafta ho gaya mera suḳhan tamkin-tar
Leave a Reply