Murtaza Barlas
saare zalim agar saf-ba-saf ho ga.e
ham tahi-dast bhi sar-ba-kaf ho ga.e
vo jo kuchh bhi na the ab hain sab kuchh vahi
dar-ba-dar saare ahl-e-sharaf ho ga.e
kuza-gar ka kamal-e-hunar kya hua
jab na kuuza bane ham ḳhazaf ho ga.e
ye tiri yaad ke ashk the is liye
aankh men misl-e-durr-e-sadaf ho ga.e
munsalik ik ḳhushi se hui har ḳhushi
saare gham ek hi gham men laf ho ga.e
baat us se sar-e-rah kya ham ne ki
navak-e-dostan ka hadaf ho ga.e
ab hamari safa.i men aa.e ho tum
jab ki bad-nam ham har taraf ho ga.e
nashr hoti rahin un ki bas ḳhubiyan
jumle tanqid ke sab hazaf ho ga.e
vo talab kar rahe hain vafadariyan
munharif jo uTha kar halaf ho ga.e
mujrmon ko mura.at itni milin
ki jara.em bhi shughl-o-shaghaf ho ga.e
tuf ye aulad-e-be-his ki jis ke sabab
ra.egan kar-ha-e-salaf ho ga.e
Leave a Reply