Akram Naqqash
gahri suuni raah aur tanha sa main
raat apni chaap se Darta sa main
tu ki mera aa.ina hota hua
aur tere aks men Dhalta sa main
kab tire kuche se kar jaana hai kuuch
is tasavvur se hi ghabrata sa main
meri rahon ke liye manzil tu hi
tere qadmon ke liye rasta sa main
asman men rang bikhrata sa tu
aur sarapa diid ban jaata sa main
hasrat-e-ta.abir se chhuTun kabhi
har nafas is ḳhvab men jalta sa main
be-karan hota hua dasht-e-guman
aur yaqin ke daar par aaya sa main
na koi manzar na ab koi ḳhayal
ab har ik shai bhulta jaata sa main
Leave a Reply