barhaman but-kade ke shaikh baitullah ke sadqe
kahen hain jis ko ‘sauda’ vo dil-e-agah ke sadqe
jata den jis jagah ham qadr apni na-tavani ki
agar kohsar vaan hove to jaave kaah ke sadqe
na de taklif jalne ki kisu ke dil ko mere par
asar se duur rahti hain main apni aah ke sadqe
ajaib shaghl men the raat tum ai shaikh rahmat hai
main us rish-e-buland aur daman-e-kotah ke sadqe
nahin be-vajh kuche se tire uthna bagule ka
hamari khaak bhi jaati hai teri raah ke sadqe
kabhu vo shab bhi ai parvana haq baham dikhavega
tu bal bal shama par jaave main huun us maah ke sadqe
dikhati hai tujhe kis kis tarah ‘sauda’ ki nazron men
jo ho insaf to jaave tu us ki chaah ke sadqe