qateel-shifai

Jaanch-Parakh Kar Dekh Chuki Tu Har Munh-Bole Bhai Ko

janch-parakh kar dekh chuki tu har munh-bole bhaai ko

kahne de ab koi sachchi baat ‘qatil-shifai’ ko

kar diya bilkul apne jaisa mujh ko andhe cupid ne

apni shohrat jaan raha huun main apni rusvai ko

shohrat chahe kaisi bhi ho log tavajjoh dete hain

laakh hasin milte hain ab tak mujh jaise harjai ko

ghabrai kyuun baithi hai ab gham-khvaron ke narghe men

le aai hai mahfil men jab tu apni tanhai ko

sab ko sunae qisse tu ne jis ki dhoke-bazi ke

us jaisa hi paegi tu apne har shaidai ko

sab se hans kar milne vaali kis ne tujh ko samjha hai

naap rahe hain muft men log samundar ki gahrai ko

pagal-pan to dekho jis din Doli uthne vaali thi

apne haath se tod diya ik dulhan ne shahnai ko

kyuun auron ke naam se chhapvata hai apne sher ‘qatil’

yuun barbad kiya nahin karte apni nek kamai ko

More Poems

Leave a Comment