Hameed Almas
chura ke mere taaq se kitab koi le gaya
miri tamam umr ka hisab koi le gaya
ye vaqi.a hai jab luTi mire chaman ki aabru
larazti shaḳh rah ga.i gulab koi le gaya
vahi to ik zariya-e-najat mere paas tha
magar mire zamir ka savab koi le gaya
saval ban ke ru-ba-ru khaḌi hui thi zindagi
mira lahu nichoḌ kar javab koi le gaya
mire badan men chubh rahi thiin suiyan si raat bhar
sahar hui to lutf-e-iztirab koi le gaya
chhupa liya hai main ne saara dard apni ruuh men
tasalliyon ka zahiri naqab koi le gaya
Leave a Reply