kisi ke muntazir rahna na darvaza khula rakhna
hamen aaya nahin dil ko mohabbat men laga rakhna
ye karb-o-dard hi dar-asl hai darkar jiine men
so in ko chahiye din-rat palkon pe saja rakhna
ḳhuda jaane faqiron men ye fan kis tarah aata hai
koi bhi saneha guzre magar chehra khula rakhna
amir-e-shahr ke logon men ik ye bhi rivayat hai
bahut maila badan rakhna bahut ujli qaba rakhna
ghazab ka mashvara de kar hai vo ab tak ghazab sha.ir
baḌe logon se milne men hamesha fasla rakhna
mire saa.e mire naqsh-e-qadam par mat chala kar tu
umid-e-rahbari bhaTke hue logon se kya rakhna
ḳhafa rahne se is darja nikhar aaya hai ghazlon men
ki ab to chahta huun umr bhar ḳhud ko ḳhafa rakhna
Leave a Reply