Farsh-E-Naumidi-E-didar

Faiz Ahmad Faiz

dekhne ki to kise taab hai lekin ab tak

jab bhi us raah se guzro to kisi dukh ki kasak

tokti hai ki vo darvaza khula hai ab bhi

aur us sehn men harsu yunhi pahle ki tarah

farsh-e-naumidi-e-didar bichha hai ab bhi

aur kahin yaad kisi dil-zada bachche ki tarah

haath phailae hue baithi hai fariyad-kunan

dil ye kahta hai kahin aur chale jaaen jahan

koi darvaza abas va ho, na be-kar koi

yaad fariyad ka kashkol liye baithi ho

mahram-e-hasrat-e-didar ho divar koi

na koi saya-e-gul hijrat-e-gul se viran

ye bhi kar dekha hai sau baar ki jab rahon men

des pardes ki be-mahr guzargahon men

qafile qamat o rukhsar o lab o gesu ke

parda-e-chashm pe yuun utre hain be-surat-o-rang

jis tarah band darichon pe gire barish-e-sang

aur dil kahta hai har baar chalo laut chalo

is se pahle ki vahan jaaen to ye dukh bhi na ho

ye nishani ki vo darvaza khula hai ab bhi

aur us sehn men harsu yunhi pahle ki tarah

farsh-e-naumidi-e-didar bichha hai ab bhi