puchha na jaega jo vatan se nikal gaya
be-kar hai jo daant dahan se nikal gaya
thahren kabhi kajon men na dam bhar bhi rast-rau
aaya kaman men tiir to san se nikal gaya
khilat pahan ke aane ki thi ghar men aarzu
ye hausla bhi gor-o-kafan se nikal gaya
pahlu men mere dil ko na ai dard kar talash
muddat hui gharib vatan se nikal gaya
murghan-e-bagh tum ko mubarak ho sair-e-gul
kanta tha ek main so chaman se nikal gaya
kya rang teri zulf ki bu ne uda diya
kafur ho ke mushk khutan se nikal gaya
pyasa huun is qadar ki mira dil jo gir pada
paani ubal ke chah-e-zaqan se nikal gaya
saara jahan naam ke pichhe tabah hai
insan kiya aqiq-e-yaman se nikal gaya
kanton ne bhi na daman-e-gulchin pakad liya
bulbul ko zabh kar ke chaman se nikal gaya
kya shauq tha jo yaad sag-e-yar ne kiya
har ustukhan tadap ke badan se nikal gaya
ai sabza rang-e-khat bhi bana ab to bosa de
begana tha jo sabza chaman se nikal gaya
manzur ishq ko jo hua auj-e-husn par
qumri ka naala sarv-e-chaman se nikal gaya
madd-e-nazar rahi hamen aisi raza-e-dost
kaati zaban jo shikva dahan se nikal gaya
taus ne dikhae jo apne badan ke daagh
rota hua sahab chaman se nikal gaya
sahra men jab hui mujhe khush-chashmon ki talash
koson main ahuvan-e-khutan se nikal gaya
khanjar khincha jo myaan se chamka miyan-e-saf
jauhar khule jo mard vatan se nikal gaya
men sher padh ke bazm se kiya uth gaya ‘amir’
bulbul chahak ke sehn-e-chaman se nikal gaya
Leave a Reply