zindagi ka bana sahara bhi
aur un ke karam ne maara bhi
ishq hi phir palaT ke aa na saka
husn-e-maghrur ne pukara bhi
kaun Duuba jo yuun pasheman hai
mauj-e-tufan bhi tez dhara bhi
ham na duniya ki raah par chalte
dil ko hota agar gavara bhi
umr bhar tirgi se khele hai
koi hansta hua sitara bhi
phuul rote hain ḳhaar hanste hain
dekh! gulshan ka ye nazara bhi
dil ki duniya to jagmaga uTThe
‘naqsh’ bhaḌke koi sharara bhi
Leave a Reply