Obaidur Rahman
justuju ke safar men rahte hain
ham ki paiham ḳhabar men rahte hain
ham ko kis ki nazar men rahna tha
aur us ki nazar men rahte hain
aarzu tum hamari mat karna
ham dua ke asar men rahte hain
ham-nava apna koi ban na saka
yuun to paiham safar men rahte hain
kal talak the charagh-e-rahguzar
bujh ga.e ham to ghar men rahte hain
juḌ rahi hai amal se ye duniya
ham agar aur magar men rahte hain
aib kyunkar hon be-hunar men ‘obaid’
aib to ba-hunar men rahte hain
Leave a Reply