Azhar Hashmi
ḳhamosh zaban se jab taqrir nikalti hai
lagta hai ki pairon se zanjir nikalti hai
TuuTa hua badhna tha shayad ki vuzu ka ho
aisi bhi to purkhon ki jagir nikalti hai
jo daagh hai sajde ka peshani-e-momin par
us daagh se ho kar hi taqdir nikalti hai
milti hai ḳhushi sab ko jaise hi kahin se bhi
bhuli hui bachpan ki tasvir nikalti hai
majruh qalam ko jab har lafz dua de den
ta umr qalam se phir tahrir nikalti hai
ho amn yahan ham men socha tha magar ‘az.har’
dekha to har ik ghar se shamshir nikalti hai
Leave a Reply