Adu Ke Pairon Se kanTe Nikalne Wale

adū ke pairoñ se kāñTe nikālne vaale

kahāñ haiñ nekiyāñ dariyā meñ Dālne vaale

uchhālte haiñ vo ab pagḌiyāñ buzurgoñ kī

hatheliyoñ pe saroñ ko uchhālne vaale

ḳhudā tujhe bhī kahīñ apne dar se Taal na de

ai apne dar se savālī ko Tālne vaale

hameñ bhī mil ga.e kuchh dost dostoñ jaise

ham āstīñ meñ haiñ ab saañp pālne vaale

dikhā.ī deñge vo ab sang-reze chunte hue

samundaroñ kī tahoñ ko khañgālne vaale

vo jin ko lutf jaḌeñ kāTne meñ aatā hai

vo kab haiñ girte huoñ ko sambhālne vaale

Leave a Comment