jab aag jali naaf ke niche to zamin phail gai
aag jali aur badan phail gae
ankhon ki avargi be-rang hui
dhuup hava chandni
sab bastiyon men khaak udi
qafile hi qafile the
qafile jo dard ke vatanon se chale
chalte gae ajnabi khushbu ki taraf
us ki taraf jis ke liye saari kitabon men likha hai
vo kabhi haath nahin aati kabutaron se chatati hai
magar raat ke darvaze pe pahunche to sitare na mile
log abhi sub.h ki ummid men shab katte hain
log dukhi log akele hain
unhen rasta do siine se chimta lo
har ik raste men jalti hui aag bujha do ki badan
phailte jaate hain zamin tang hui jaati hai
jo aag bujhane ke liye aae the
sab khaak hue laut nahin paae
hava un ke liye dastaken deti hai
zamin un ke liye phuul khilati hai
Leave a Reply