Phir Ek Nae Safar Pe Chala Hun Makan Se

phir ik nae safar pe chala huun makan se

koi pukarta hai mujhe asman se

avaz de raha hai akela khuda mujhe

main us ko sun raha huun havaon ke kaan se

kuchh din to be-ghari ka tamasha bhi dekh luun

yuun bhi hai ji uchat purane makan se

donon hi ham-safar the havaon ke dosh par

par main huun chuur chuur safar ki takan se

pairon tale dabi hai vahi ret ki chatan

mujh ko hava ne phenk diya asman se

vo zad pe aa gaya tha nihatta bhi tha magar

main ne hi koi tiir na chhoda kaman se

mere labon pe khel rahi hai vahi hansi

har-chand ret ret hua huun chatan se

More Poems

Leave a Comment